AWIT SA MAMOMOO

Kamí maó ang mamomoo,
     Sa mga manggugubut kaliwat:
     Gihigugma namo ang tanán’g tawo
     Nga sa kagawásan walá magsupak.
Kamí maó’y mga anák sa buhat,
     Nga sa amo’ng singót nabuhi;
     Gikasilagan namo ang pangawat
     Hangtud ang panlimbong gani.
Kamí ang mahigugmaon sa buhat,
     Arón sa banay aduna’y ikabuhi.
     Madaóg namo bisan mabug-at
     Kon maó’y mag-agda ang salapi.
Gitamay namo ang kataspok
     Ug gimanggad namo ang kakugi,
     Sa adlaw’ng tanán kamí nagalihok,
     Maó da’y ipahuláy namo sa gabii.
Apan bisan kamí mga kabús,
     Dili namo tagdon ang mga kalisód:
     Hangtud kinabuhi amo’ng itapus
     Kon kinahanglanon sa amo’ng lungsod.
Ania kamí, Oh, inahán namo’ng Yuta,
     Nanagbuhat ug nanag-awit
     Adlaw, mga Bitoon sa imo’ng bandila,
     Maó’y nag-iwag kanamo gikan sa langit.
Kamí maó ang mga mamomoo
     Nga sa mga manggugubut kaliwat,
     Higala namo ang tanán’g tawo
     Nga sa kusóg dili mangawat.

FERNANDO BUYSER.

________________________________________

Pinahinungud sa tag-iya sa WALÁ’Y IGSOON....

Juan Villagonzalo Irles, 1912, Wala’y Igsoon (Sugilanong Binisaya), Awit sa Mamomoo, p51, Patikanan ni Falek, Sugbo, Sugbo, K.P.