ANG RETRATISTA

May usa ka tinun-an nga dalagahay
Nasuko ug nakigbinkil sa Retratista,
Daku kaayo ang kahiubos ug pagmahay
Tungud kay nasiga ang iyang mga mata.

Dili, dili ako modawat ning hulagway
Kay malagsot ra kaayo nga pagkakuha,
Oh!, tan-awa ra, nahiwi ang akong dagway . . .
Dungan ang pagpatulo sa mga luha.

Ang maghuhulagway durong pamalikas
Batok niadtong sa hulagway wa modawat,
Sa iyang kapungot ang retrato gipikas
Ug nagbagutbot: "Sa yawa ka kaliwat!".

Unsay gusto mo nga kini imo mang dagway,
Babaying garbusa, anak sa panulay!
Gusto kong maanindot ang akong hulagway
Kay idayandayan ko sa amohang balay.

Gitirahan pag-usab sa Retratista
Sa tuyog tinguha nga nagasampangay,
Apan, naunsa! Gidagaw ba ang ilang mata
Nga ang dalaga may ikog na, may sungay!

SOURCE:

Buyser, Fernando Aquino (1941). Ang Retratista. Balangaw: Pungpong Sa Mga Balak ni Floripinas (p. 37). Siyudad sa Sugbu.

YLAYA

Sa "Ylaya Marble Work"

Siyudad sa Sugbu

(SONANOY)

Kinsay mahagugmang moadto sa Ylaya

Sa subang matin-aw, tubig malinis!

Nan, katkat sa pangpang daw ang paliya,

Bagon ikapyot sa batong bantilis.

Sa landong sa lungib anaa mogikan

Tuburang matam-is, tubig mabugnaw,

Salamin sa Bulan, sa Adlaw gihagkan,

Banwang pinulog sa langitnong silaw.

Kadtong makalampas niadtong dapita,

Mobatig kalipay nga dili igkita,

Ang Diwa mohatag lig-ong ginhawa . . .

Kay didto: Awit, Arsi, honi, hudyaka,

Balas nga bulawan sagul sa mutya,

Ang kahayag ug ang gugma gahadla . . !

Sugbu, Hulyo 11, 1940

* Ylaya, mao ang ngalan sa Pilipinas sa wala pa mangabut ang mga kastila matud pa ni San Jose A. Burgos (La Vida del Filipino Pre-Historico. Toms I, pag. 6)

SOURCE:

Buyser, Fernando Aquino (1941). Ylaya. Balangaw: Pungpong Sa Mga Balak ni Floripinas (p. 27), Siyudad sa Sugbu