Sa Hinalaran Kong Bandila

¡Oh!, Bandilang Pilipinhon, matahum dili samahan,

Sa sakop niining dughan ginasimba ug ginahalaran,

Lipaya ug ayaw talikdi, oh!, tambal sa kasakitan,

Ambungan ug hamili nga daw Bitoon sa kahitas-an.

Pamatia ang panghupaw sa mga kalag nga masulub-on,

Ikaw maanyag sama sa Adlaw, sa Bulan ug mga Bitoon,

Sa way sukod nga gugma kanunay ka ginahalaran,

Sa mga maisog nga manlalaban sa Yutang Natawhan.

Napapas na ang kaguol nga nagahari sa mga dughan,

Ikalagiw kanamo ang maitom landong sa kaulipnan,

Sa ibabaw sa mga langit gakasiga ang mga Bitoon

Ug ang matahum mong adlaw mibanos sa kagabhion.

Dawata Bandilang maambong king balak ko nga maluspad,

Nga buut ko pagaawiton kon sa langit na ikaw iladlad,

Kuyog sa gugmang gadilaab, ulay, putli ug way buling

Sa atubangan sa mga langit Kanimo manalangin.

Pahiri ang among mga luha nga sa aping nanaligdig,

Tugod sa ikamatay nga kamingaw nga walay indig,

Kay buut ka pasipad-an, ay!, sa mga tawong maluibon

Nga nagapuyo sa kangitngit sa maitom nga kagabhion.

Ikaw humut nga Bulak, Sagisag sa Yutang Natawhan,

Diin ag Adlaw musilak, sa mga Bitoon gilibutan;

Mapapas ug mangahanaw ang tanan kong mga kasakit

Kon magasud-ong kanimo nga nagkayab ka sa langit.

¿Wala ka ba masayud sa lakad ko nga paghigugma?

Ang mga bukid saksi sa gibati ko nga way sama,

Mailo sa kalipay kon dag-uman sa usa ka pagpilok,

Pati Yutang Natawhan sa lawud daw mahatiurok.

Ikaw matahum nga Bulak sa tulo ka bulok naggakit,

Nga sa imong kahumut imong gipalinaan ang langit,

Humalatag sa kalinaw ug haligi sa pakigdait,

Mao ang among kalipay ug tambal sa mga kasakit.

Kanang malumo nga hangin nga muhalok sa imong dagway,

Kalag ug kasingkasing suluguon sa gugma nga ulay,

Kagikan sa kahayag ug katahum nga walay sama,

Kanunay nga ginaiwagan sa kalayo sa akong gugma.

Agosto 4, 1904

SOURCES:

Buyser, Fernando Aquino (1936). Sa Hinalaran Kong Bandila. BASAHON SA MGA BALAK (pp. 117-118). Mabini Press, Sugbo.

Photo. https://en.wikipedia.org/wiki/Marcela_Agoncillo#/media/File:Amorsolo%27s_The_Making_of_the_Philippine_Flag.png