Gakasiga sa bulawan ug mga mutya
Kining ginasimba kong Yutang Natawhan,
Matam-is nga pahulayan ug maoy himaya,
Sa mga masulub-on kalipay sa dughan.
Nagahayag daw Bitoon ang mga Dalaga,
Mahal, hinigugmang anak sa Pilipinas,
Kaparang sa Adlaw, Bulan ang ilang kasiga,
Sa kasubo sa magsasakay makapapas.
Ingon sa mga Manulunda malipayon,
Nagpangalimyon sa kahumut sa Sidlakan,
Mga liryo namuklad sa mga baybayon
Niining hinalaran kong Yutang Natawhan.
Makadani tan-awon ang ilang panagway,
Subangan sa paghigugma ang ilang kaanyag,
Mga mata manunoy ug makabibihag,
Sa dughan ug kasingkasing makalilipay.
Kamo mao ang Suga nga sa yuta ko nagaiwag,
Bitoon sa dagat sa batid nga magsasakay,
Ug sa Pilipinas masigang banagbanag,
Nga sa kangitngit sa gabii nagasalikway.
Kaanyag ug kahumut nga dili ikapananglit
Sa tanan nga mga bulak sa tibuok kalibutan,
Ang babaying Pilipinhon tabunon nga panit,
Matam-is awiton dinhi niining kadagatan.
Ikaw bulak nga tuburan sa mga garay,
Nga ginaawit sa kadagatan ug kabukiran
Matam-is ka nga pagabalakon sa kanunay,
Sa mga masulub-on gugmang pinasikaran.
Sa ngabil sa mga maguuma akong hingdunggan
Ug sa mga panday, bakiro ug mananagat,
Gitambalan sa kakapoy ug kagul-anan
Magsisiba aron madaog ang mabug-at.
Ikaw ang gidamgo sa mga mahigugmaon
Ug ginikanan sa kalipay ug pag-antos,
Gikan sa mga hunahuna nga maluibon
Ug sa usa ka gugma nga walay pagkatim-os.
Usa ka garbo sa akong Yutang Natawhan
Gihigugma sama sa ikaduhang Bathala,
Dunay usa ka halaran sa sulod ning dughan
Nga giiwagan kanunay sa putli ga gugma.
Maambong ug makalilipay kamo sud-ongon
Nga gidayandayan sa Yutang Natawhan
Nga bag-ong nakagawas sa pagkaulipon
Bag-ong nakakaplag sa iyang Kagawasan.
Dili matukib ang bation kong kagul-anan,
Kong tan-awon ko nga malarag sa hinuyuhoy,
Ug mapalong ang kaanyag ug ang kapalaran
Tungod sa kabangis sa gugmang walay kaluoy.
Tan-awa kanunay ang atong Yutang Natawhan
Nga nagtukaw, nagabantay sa walay hunong,
Tuburan sa kaputli, lindog sa kinaadman,
Nga kanatong tanan maghiusa ug maghugpong.
Kaninyo ako sa pagpalandong muduyog
Makigtipon unta sa usa lang ka hunahuna,
Ihalad ko sa Yutang Natawhan ang kusog
Aron hipalgan ang kaayuhan nga gipangita.
Hulyo 23, 1904
SOURCE:
No comments:
Post a Comment