Dawata Kining Balak

(Sa Akong Yutang Natawhan)

Hinigugmang Pilipinas, ang silimbahon kong bulak

Sa Kabitoonan, Bulan ug Adlaw minahal kang mutya,

Hiyas nga dili ikagsaysay sa dughan ko nagainggat

Sa kainit sa kasingkasing bulak nga dili malaya,

Ikaw ang hinugdan sa kasakit, ikaw ang himaya.

Anaa nagasud-ong ang langit uban sa mga Bitoon,

Anaay usa ka gamhanan nga kanimo nagabantay,

Gipatindog ang mga tunghaan kay didto pagaagakon

Ang maluyahon nimong lungsod sa pagtuon sa kanunay

Aron gayud sa imong kaayohan ug sa imong mga banay.

Alagad sa dakung pagbati dinani sa kaayohan

Mamulong ako kanimo sa tingog matinahuron,

Ang gahum sa us aka “Republica” kun usa ka Ginharian

Anaa sa dakung gugma sa tanang mga lungsuranon

Kay siya ang nagasapnay, anaa man kaniya ang kagahum.

Tungod sa imong Kagawasan amo nga ginahibalag

Ug ginalabang namo mga bukid nga makalilisang,

Mapait nga mga pag-antos ug kamingaw sa among kalag,

Gipabantang namo ang dughan sa baba sa mga luthang

Ug sa among mga kabudlay misubang ang banagbanag.

Nahikatulog ako sa paglaum sa matam-is nga saad,

Pinasanong sa dughan sa usa ka lungsod nga dungganan,

Nga ang katubsanan anha ra sa ilang kamot ipasikad,

Sila ang magahatag sa pinangandoy tang Kagawasan

Oh! Pagkabulahan kong ang Bandila namo mubuklad.

Dawata kining balak ko nga kanimo maoy itahud,

Ako kanimong ihalad, iawit ug igaraygaray,

Uban sa mahigugmaon, sa tiilan mo ako magaluhod

Kinabuhi ihatag sa atubangan sa mga kaaway

Nga kanimo magpasipala, pinasikad sa Balaod.

Wala koy laing ikahatag nga kanimo makalipay

Kini rang akong mga buhat ug ang gugma kong hingpit

Kay ang paghulat mao ang pag-antos sa adlawng malaay

Apan kalipay kay dunay tambal sa mga kasakit,

Bulahan kadtong adlaw, adlaw sa atong mga kalipay.

Hulyo 23, 1904

SOURCE:

Buyser, Fernando Aquino (1936). Dawata Kining Balak. BASAHON SA MGA BALAK (pp. 119-120). Mabini Press, Sugbu.